تامر حسني لحلا شيحة: الحرام بالنسبالك إن الكليب ينزل على اليوتيوب.. لكن جوا السينما عادي؟
ميار أحمد
علقت الفنانة حلا شيحة صباح اليوم على حسابها الخاص على انستجرام بعد عرض كليب يجمعها مع الفنان تامر حسني في فيلم "مش أنا" قائلة: "أنا أتفاجئت بنزول كليب يجمع فيه مشاهد متفرقة من الفيلم وفي أيام ذي الحجة المباركة، واتفاجئت أكتر بعد وعد تامر حسني ليا وتأكيده أنه هيحترم رغبتي وبعض الطلبات اللي طلبتها منه، مضيفة احنا يمكن نجحنا بمقاييس الدنيا بس صدقوني بمقاييس ربنا احنا لم ننجح ، انا عارفة ومتأكده ان زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح".
وتابعت: "بتكلم من قلبي الكليب ده ميرضيش ربنا وانا عيطت لأني شفت نفسي في المشاهد دي، وانا تبت من المشاهد دي وهي لا تصح وأنا غلطت".
ورد عليها الفنان تامر حسني منذ ساعة على حسابه الخاص على موقع الفيس بوك قائلا: "أنا عمري ما وعدتك إن الكليب مش هينزل ده محصلش اصلاً يا حلا مش أنا خالص اللي أوعد و أخلف، والحقيقه اني إحترمت كلامي معاكي ووعدتك أشيل مشاهد تانيه طلبتيها و شيلتها بالفعل و شكرتيني عليها و لو حابه تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجوده ، مضيفا الفيلم بقاله ٣ اسابيع في السينمات و الكليب موجود جوا الفيلم وهو بالنسبالك الحرام إننا ننزل الكليب على اليوتيوب بس !!إنما الكليب يتشاف جوا السينمات عادي ؟؟منطق غريب فعلاً يا حلا".
وتابع: "هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه، هو مش إنتي اللي صورتيه و مثلتيه بنفسك و بمنتهى الرضا ولا حد أجبرك ؟
وأضاف موضحا للجمهور: "أنا و المخرجه الأستاذه سارة وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها ، مكنتيش بتردي علينا و تليفوناتك كلها كانت بتقفل في وشنا، إنتي للأسف يا حلا متعاملتيش صح مع الموقف وكان لازم تهتمي بأمرك أكتر من كده و لو كان ليكي أي طلب تاني كنت هعمله بكل حب إنما إنتي فجأه أختفيتي و مكملتيش تركيب صوتك في الفيلم ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع".
واختتم حديثه قائلا: "أي فيلم بيبقى ليه خطه مسبقه في الدعاية و انتي عارفاها كويس و وافقتي عليها و ده كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي ده للأستاذ ماجد الكدواني مثلاً هو دا يُعقل ؟أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحاجات كتير يمكن فايتاكي بس مش هتفوتني".
