بعد تكريم اسم الشيخ صالح.. صفاء أبو السعود: مهرجان القاهرة للدراما عالمي

علقت الفنانة صفاء أبو السعود أرملة الشيخ صالح كامل، على تكريم اسمه في مهرجان القاهرة للدراما، الذي أقيم أول أمس في مدينة العلمين.

وقالت صفاء أبو السعود خلال تصريحات تليفزيونية: الحقيقة نفسي أقول حاجة، الانبهار اللي شوفته في العلمين الجميل وهذه الاحتفالية الرائعة كنت أتمنى أكون في مصر أشارك بالاحتفالية بأي طريقة، ولكني كنت خارج مصر للأسف، وانبهرت بالشركة المتحدة واللي عملته حاجة حلوة وجميلة وحاجة حلوة لمصر إنها تفتكر دايما كل شخص تعامل وتعاون معاها أو قدم حاجة تخدم مصر، وعايزة أشكر نقابة المهن التمثيلية  الحقيقة شيء مبهر والاحتفالية واختيار المكان في حد ذاته عالمي، حاجة عالمية ورائعة.

وأضافت صفاء أبو السعود: كان حلم والله وعايزة أقول إن الشيخ صالح عاشق لمصر طول عمره دايمًا، أول مسلسل أنتجه في حياته كان مسلسل مصري سنة 1969، وتوالت الأعمال زي الراية البيضا والبخيل وأنا وغوايش، وقصة حبنا ابتدت فعلًا بغوايش، وهو عمل حاجات كتير زي أحلام الفتى الطائر وهند والدكتور نعمان كانوا إنتاج الشركة العربية التي تتبع للشيخ صالح كان بيحب مصر في الاستثمارات وأشياء كتير، مصر هي البلد اللي جوا قلبه مفضلة.

وأردفت: قد إيه أنا مبسوطة جدًا، حاجة جميلة جدًا مصر بتحتضن كل شخص من أي جنسية ومن أي بلد ومفيش تفرقة وبيكرموا شخصية اشتركت وعملت حاجة وتذكروه في وسط خضام المنتجين والمؤلفين في مصر، كان دايما يقول مصر فيها أول طبيب يعالجه وأول أستاذ درسله مصري، بيحب مصر والنيل وإسكندرية لذلك الحاجات دي علمت في شخصيته، الحلو بقى إن مصر حبته وقدرته ودي حاجه جميلة جدًا بشكركم كلكم.

أما عن استلام ابنتها نضير التكريم، قالت صفاء أبو السعود: بناتي للأسف مش في شجاعة صالح، كان يقتحم وشجاع، هما خجولين جدًا معرفش ليه.