عمرو أديب: عدم التنسيق بين وزارتي الكهرباء والبترول سبب أزمة قطع التيار

قال الإعلامي عمرو أديب إن بيان الشركة القابضة للكهرباء حول تخفيف الأحمال يعني أنه سيبدأ نظام جديد في قطع الكهرباء، يعني الكهرباء هتقطع لمدة تصل إلى ساعة وتلت لتخفيف الأحمال، وأول لما النور يتقطع يا مواطن اعرف إن قدامك ساعة وتلت على ما الكهرباء ترجع، البيان ناقصه سطر إننا هنفضل نقطع التيار لمدة قد كده".

اجتماع وزارة الكهرباء

وتابع خلال برنامج "الحكاية" المذاع على قناة "إم بي سي مصر": "معلومات إن وزارة الكهرباء كان فيها اجتماع ضخم وأخذوا قرارات مهمة ويبدو إن عندهم إجراءات لإعادة انتظام التيار الكهربائي في ربوع مصر".

وتابع: "اللي فهمته إن قطع الكهرباء الأيام المقبلة لن يزيد على ساعة و20 دقيقة فبلاش نركب أسانسير في الفترة دي".   وأكمل: "مفيش مع البيان صيغة تنفيذية أو شرحية، وما قالوش لنا بتوع الكهربا ولا الحكومة متى تنتهي الأزمة، والبيان يؤكد أن هناك سيستم، هل هذه المشكلة الكهربائية هتنتهي الأسبوع ده؟ فيه ناس بتقول هتنتهي الإثنين أو الثلاثاء، هل هيقدروا؟ ما أعرفش، فيه حاجات ما اتكلمش فيها".

وتابع: "كلام وزير الكهرباء كان واضح عندنا نقص في الوقود أو الغاز بالتحديد، وعلى الجانب الآخر في البترول فهمت إن الغاز اللي عندهم له لازمة هيروح حتة وهندعم تعاقدات على الغاز اللي عندهم بتاع ناس".

واستطرد: "مفيش وقود والوقود عند وزير البترول، وأنا مش شايف إن وزير الكهرباء غلطان ولا وزير البترول غلطان، الغلطان عدم التنسيق بينهم، المفروض يبقى فيه تخطيط وتنسيق ما بينهم إلا إذا هو فعلًا أنت محتاج تصدر الغاز علشان توفر دولار وهنا يبقى الله غالب ونمشي نفسنا بالظروف الحالية".