زيزي عادل تكشف سبب اعتزالها الغناء.. حرام

قالت الفنانة زيزي عادل: "لما كنت مطربة وقبل الاعتزال كان شغلي الشاغل اللايكات والفيديوهات والحفلات واللبس وهاعمل شعري ازاي واسم الأغاني واكتشفت حاجة مهمة إني مش هاخد معايا في لقاء ربنا حاجة من دول".

اعتزال زيزي عادل الغناء 

وتابعت خلال لقائها ببرنامج "كلام الناس" المذاع على قناة "إم بي سي مصر": "لقيت إني مش هاخد معايا حاجة لما أقابل ربنا غير أعمالي، وبدأت أفكر إني مش مستعدة تماما أني أقابل ربنا باللايكات والحفلات والصور، فكنت عايزة بيني وبين نفسي إني أحس أني مستعد للقاء الله خصوصا بعد موت ناس صغيرة على معرفة بيهم في فترة كورونا".

وتابعت: "اكتشفت أن الموت ملهوش سن ومفيش حاجة اسمها بدري، وهذا كان سر خوفي واعتزالي الغناء لأني مكنتش مستعدة اقابل ربنا ".

ولفتت:"علشان أغني لازم اعمل فيديو كليب واستعين بموديل يطلع معايا وهطلع وفيه قصة ولابسه لبس معينة وحاجة غلط بتحصل في النص، وعلشان اقول كلام اغنية فيه حب أو هجر أو عتاب فهذا به تحريك مشاعر للناس اللى بتسمعه، فهي الفكرة كلها حرام، وعلشان اطلع أغني على المسرح لازم البس فستان واتحرك مع الموسيقى وده حرام، وفيه حاجة كانت بتجنني في الحفلات موبايلات الناس اللى بتصور من زوايا معينة وبيجبني ويزووم من الحتة اللى هو عايزها وهو بيروح علشان يصور مش يحضر الحفلة، فكنت معرضة اتصور علي كل موبايلات الناس وأكون مباحة ومتاحة لكل الناس وده حرام، فلقيت اني مش حابة اكون متاحة لكل الناس، وطريقة لبسي بعد الاعتزال اتغيرت وبقيت محتشمة وينقصني بس الحجاب".

وعن دور الداعية مصطفى حسني في اعتزالها، أوضحت زيزي عادل: "اخترت لدعمي في قرار اعتزال الغناء لإني بحب اسمعه وبتابع فيديوهاته من قبل الاعتزال، وبحب كلامه وهو بيتكلم عن التسامح وأمور إيجابية جدا، وبيقدر يوصلي المعلومة بطريقة حلوة وهو كلامه مريح".