فريدة سيف النصر تهاجم المسؤولين عن إلغاء حفل محمد رمضان

دافعت الفنانة المصرية فريدة سيف النصر عن مواطنها النجم محمد رمضان وذلك إلغاء حفله، الذي كان من المقرر إقامته في أكتوبر الجاري.

وتعرض محمد رمضان للهجوم من بعض المتابعين بعد إلغاء حفله في الإسكندرية والذي جاء بعد الكثير من حملات المقاطعة، ما اضطر فريدة سيف للتعليق عبر حسابها على "فيسبوك"، قائلة: "هو في إيه.. محمد رمضان، كده أوفر أوي، اللي بنسمعه ده أغرب من الخيال"

وتابعت: "طول عمرنا بنعمل مسرح في ماريا عروسة البحر الأبيض، طول عمرنا عارفينها فاتحة أحضانها للفن، وهي منبعة أكرم ناس ذواقة لكل الألوان من مستوى السيد درويش لحد بدارة، وحمو بيكا وأكتر من كده هو وزمايله".

وأضافت فريدة سيف النصر: "اشمعنى بقى.. لا إله إلا الله، على فكرة اللي تخرب بيته اللي عامل الحفلة، وعارفينهم حقيقي باعوا التذاكر كلها، طيب الناس اللي بتحبه يولعوا يعني علشان العند والتصاريح، على فكره معجبيه كلهم شباب، وغالبية عظمى ملهمش في عند وحقد العواجيز ومحاولات الهدد، لكن لو سعادتك ارتحت يهمنا راحتك يا رب بردًا وسلامًا، يا ساتر يا رب".

فريدة سيف النصر تهاجم المسؤولين عن إلغاء حفل محمد رمضان 

وهاجمت المسؤولين عن تصاريح الحفل قائلة: "المسؤول عن التصريح ناقص يدخل اللي مش على مزاجه بفيزا، واللي مش قادرين يفهموا الفنان لو له عمر بيستمر أكثر من أي مركز وكرسي زائل، هو إيه الغلب ده هو تار ولا إيه طيب نفهم علشان مندافعش فهمونا يا ريسنا الإسكندرية مش بتاعت أي مسؤول، دي بتاعتنا كلنا معظمنا أهالينا هناك عند العروسة وكرم الدنيا والجدعنة".

واستكملت حديثها قائلة: "الإسكندراني مبكرهش حد وبيحب كل الألوان ما بيكا أهو مثل تاني أهو.. يعني إيه تصاريح؟ محافظات مصر كلها للمصريين.. وكل ده وقت لتصريح حفلة معروفه للكل واشمعنى الأجانب هوا يتعمل كل حاجة وحفلات لغير مصريين على رأسنا، لكن بالنسبة لأبنها إيه بقى هو في إيه؟ الحرب والحقد مش للدرجة دي كتير كدة الإسكندرية أهلها بس اللي يقرروا، ولو قالوا يبقى تمام، لكن عند مع مسؤول مينفعش".

وهاجمت فريدة سيف النصر منتقديها الذين اتهموها بالدفاع عن محمد رمضان بعد انضمامها لمسلسله "العمدة"، وقالت: "واللي يكلمني ويقول لي بتطبل له أهو شغلك معاه.. إيه الأدب ده، أولًا رمضان مبيدخلش في حاجة في حاله ومحترم قسمًا بالله، وبرضه مسلسل موسى محمد سلامة اللي رشحني، ده ابني يعني اسألوه، ومسلسل العمدة اللي مرشحني محمد سامي وكنت عايزه اشتغل معاه بجد، وأنا بحبه هو ومي جدًا من القلب للقلب، ده لو بيقبضني وعامل لي بطولات مش هتضايق كده بس بجد حرام نهدى بقى".

وأردفت: "وتاني بسيطة نعمل له مسرحية في بلدنا الإسكندرية ونعرف بقى بتصريح ولا خيبة تقيلة، بعد العمر ده كله فيها وقبل ما الكراسي دي ما اتقعد عليها، وياما راح وجه كتير ومشيوا معاش فوقوا هو في إيه، ولا يمكن هناخد فيزا قريب ما هو هيبقى للفنانين كلهم بقى ولا يكون معمول لـ رمضان بس يا عيني يا بني، حلوة فيزا دي ما هو كان ده المخطط ناسيين الله المستعان".

وأنهت حديثها قائلة: "أنا بقى ربنا خالقني كده وبخسر على فكرة بس بكسب نفسي اللي بصدقه وألاقيه مظلوم بجد، أو مستهدف بدافع طالما مقتنعة، هو مش أسوء ما فيها بس كل موضوعه ربنا، كل ما بيتحارب بيوسع عليه أوي، ويقف جنبه ومحبينه يزيدوا حاسبوا ربنا بقى، استغفر الله جرى لنا إيه؟ ويبقى السؤال مين السبب هو في حد اشترى العروسة، فهمونا دي بتاعتنا حتة من روحنا وعمرنا نفهم، سلام".