بعد اللوك الجديد.. فريدة سيف النصر تحذر الجمهور من الاحتجاب عن الإعلام

تعرضت الفنانة فريدة سيف النصر للهجوم من بعض المتابعين بعد تغييرها لون شعرها، ما اضطرها للتعليق عبر حسابها على "فيس بوك"، قائلة: "هو في إيه بجد؟ إيه الخيبة اللي أنا فيها دي؟ كل ما أتنفس ولا أتصور ولا أتكلم أبقى تريند وحديث المدينة، ليه خير إن شاء الله؟".

وحذرت فريدة جمهورها من أنها قد تحتجب عن الإعلام، موضحة: "هتحرموني أكون ذوق وأدي أخبار أو أرد على صحفيين خالص، وللعلم مابحبش أصد حد أو التعالي بالذات الشباب الجديد، يكون جزائي عكس الكلام وعناوين فرقعة علشان التريند".

لوك فريدة سيف النصر الجديد 

واستكملت سيف النصر: "محسيسني إني لسة صغنونة نوغة، وإني مثلا نزلت صورة بلبس مثلا ملفت، مش قاطعة لكم راسي وبس، مالكم بجد؟، وجرايد ورقية محترمة ومواقع برضو كبيرة هو مفيش غيري؟، في ناس أحلى وأصغر وأهم عندهم يرغوا فيه".

وختمت الفنانة منشورها بقولها: "الأمانة والمهنية أهم من مصطلحات السوشيال ميديا الجديدة دي، وعموما كده عيب لأي حد احترمته رغم صغر السن والحداثة في المهنة، ورديت وحبيت أسانده والنتيجة علشان فرقعة تخسرني، ماشي ألف شكر، ومش هرد تاني مع اعتذاري للجميع".

يذكر أن فريدة ظهرت خلال الصور بشعر أصفر غير مهندم، وهو ما علقت عليه بقولها: "ربنا يستر ما تخافوش، دي مرحلة سحب اللون الأسود وقصيت شعري".

وأضافت: "حبيت أوريكم وبعد ما أعمل اللون والصبغة الجديدة نيو لوك، وأعمل شعري هاوريكم، ما تعرضوش دلوقتي، مش ده اللون، غيرت أصلي زهقت مني، وعلى فكرة بدون ميك أب، إن كان عاجبكم، الستات لما بتكبر بتجنن".