"خليكي بطلة في قصة حياتك".. تامر حسني يوجه رسالة دعم لأحدي معجباته
هاجر عاطف
وجه النجم تامر حسني رساله حماسية وتوعوية، لفتاة حيث نشر فيديوهات خاصة بها من أجل أن تتحلى بالصبر بسبب ألم جسدها الذي تعاني منه.
وكتب تامر حسني علي الفيديو عبر خاصية الاستوري عبر صفحته الرسمية على موقع الـ"إنستجرام”: “ يا بسومة يا قمر لسه عارف قصتك أولًا ربنا يفرح قلبك أنتي وجوزك العزيز اللي وشه مليان طيبة وبخصوص ألمك وتعبك اللي قريت قصته، يا بسومة كل واحد في الدنيا عنده اختبارات في الصبر والشاطر اللي بينجح فيها ربنا قال وخلقناكم في كبد يعني شقاء وتعب عشان الراحة المطلقة بتكون في الجنة بس وكل الناس في الكون عندهم مشاكل وتعب مش أنتي بس يا حبيبتي”.
خليكي بطلة في قصة حياتك
وتابع: “قولي الحمد لله عشان أنتي رغم التعب أحسن من غيرك، قولي شكرًا يا رب علي أي محنه وحوليها بقوتك وصبرك لمنحه تعرفي فيها ربنا أكتر، متقوليش ليه كدة يا رب، لا قولي يا تري إيه الدرس اللي عايزني اتعلمه يا رب، خليكي بطلة في قصة حياتك ومفيش بطل بييأس ويتهزم، عمرك سمعتي عن بطل مفيش في حياته معاناة بالعكس كل بطل بيكون في حياته معاناة ومصاعب وآلام بيعديها ويوصل لحلمه حتي لو حلمه أنه يتصالح مع نفسه ويرتضي بما قسمه الله له، عشان خاطري قولي انا راضية واشكريه والله والله هو يستاهل الشكر والحمد في كل الحالات وأوعي تبصي لحياة ناس تانية تتخيلي أن معندهمش مشاكل لا خالص، مفيش”.
وأضاف: “مفيش حد مرتاح راحه مطلقة وخالي من المشاكل والمتاعب، الوحيد اللي هيكون مرتاح هو اكتر الناس إيمانًا وارتضاءً بقضاء وحكم ربنا، سلميله من قلبك واحمديه علي الموجود والمش موجود عشان كان ممكن المش يكون اكتر واكبر من كده، بصي للي حياتهم أصعب وشاكرين وحامدين ربنا، بسوم يا قمر اضحكي وافرحي ربنا بيحبك وبيطبطب عليكي بطريقته لازم تفهمي كده وأنا مين حرك قلبي وخلاني اكتب كل الكلام ده”.
ربنا الوحيد اللي مطلع علي قلوبنا كلنا
واستكمل: “رغم اني معرفكيش وأول مرة أسمع قصتك وكمان عايشة في آخر بلاد الدنيا فكرتي؟ مفيش غيره ربنا الوحيد اللي مطلع علي قلوبنا كلنا وبيسخرنا لبعض في لمح البصر زي ما كنتي من شوية بتقولي بفكر انتحر وبتبكي وأنا واثق أن حالك اتبدل وأنتي دلوقتي مبسوطة أوي، وكلامي ليكي وكل حد شبه حالتك يا ريت ياخد الكلام علي نفسه ويقوي نفسه بيه، جايز طلبك أني اكتبلك اللي في قلبي من تشجيع يفيد ناس تانية وتبقي أنتي كمان سبب في ناس كتير ممكن الكلام يلمسها وحالهم يتبدل، ربنا يحميكي يا بسوم وينصرك ويبعد عنك أي فكر مش سليم ويقويكي علي صراع الدنيا وأفكارها، وخليك فولاذي يا بطل، اسمعي مش تمثال وشوفي فيلم مش أنا، واسمعي أغنية الموضوع فيك”.
واختتم تامر بـ: “كفاية فرحة قلبك بعودة زوجك الفاضل من الرحلة الصعبة دي الله كريم، يا رب تكوني فرحتي دلوقتي”.
