قصة انتحار رنا فتاة المنصورة: "كان نفسي حد يطبطب عليا"

رحلت طالبة المنصورة "رنا" عن الحياة تاركة رسالة لتكشف الأسباب الخفية لاقدامها على الانتحار وهي سوء معاملة أهلها لها وعدم مساندة أسرتها لها في الأزمات المختلفة.

 

وكتبت "رنا" على صفحتها على مواقع التواصل الاجتماعي "فيس بوك": "أنا حزينة حزينة أوي إني وصلت للمرحلة دي، وأنا بكتب الرسالة دي مش شايفة من كتر الدموع اللي بتنزل من قلبي مش عيني، أنا تعبت تعبت أوي واستحملت كتير أوي بس أنا إنسانة عندي طاقة مش قادرة استحمل كل ده لوحدي، أنا بس كنت محتاجة حد يطبطب عليه وياخدني في حضنه".

وأضافت فتاة الدقهلية: "أنا عمري ما حسيت بحنية أم ولا أب ولا أخوات ولا أصحاب، أنا عايشه لوحدي حرفيًا رغم وجود الناس دي حوليا انا لوحدي والوحده وحشه أو ي ومُتعبه أوي أنا اتهلكت واتأذيت واتخذلت من اقرب ناس ليا وف الاخر يتقالي معلش، محدش يكلف نفسه يفكر فيا ولا يفكر ف إحساسي، أعيش ليه، أعيش لمين، أنا في الوقت ده كنت عاوزه بس اللي يحسسني إني استاهل أتحب وأن حد يفضل معايا عشاني عشان بيحبني".

وأكملت فتاة الدقهلية في رسالتها: "أنا حاربت الناس كلها عشان أبقى كويسة وكل محاولاتي فشلت، أتاكدو إني موصلتش لهنا بسهولة كدة لا والله أنا عافرت عشان موصلش بس للأسف الحزن كان أقوى مني أتمنى ربنا يسامحني ويحاسبني على تعبي وقلة حيلتي مش على عدم إيماني به، حاجة أخيرًا أنا كنت لوحدي ودلوقتي لوحدي فأتمنى محدش من أهلي يحضر جنازتي لأني ماشية زعلانة منهم كلهم ومش مسامحة في حق نفسي أبدًا، ادعولي بالرحمة افتكروني بالخير وأتمني متنسيش زي ما كنت منسيه وقولو للشخص اللي ختم نهاية حياتي إنه كان أملي الوحيد وللاسف خذلني، عرفوه إني كنت بحبه عرفووه اني خلاص فارقت الدنيا دي وانا حزينه وزعلانه علي نفسي.

وختمت فتاة الدقهلية رسالتها: "هيعرف بالصدفة أني موت زيه زي ناس كتير أوي كانت فحياتي حفلة تخرجي بعد بكره هي مش حفلة تخرجي من الكلية بس ومن الحيااة كلها، ادعولي ربنا يسامحني ومحدش يقولي ماتت كفره لأن الكُفر هو إني افضل عايشه مأذيه ومنسيه ووحيدة".

و تلقى اللواء مروان حبيب مدير أمن الدقهلية إخطارًا من مدير المباحث الجنائية يفيد بورود بلاغ لمركز شرطة بلقاس من مستشفى بلقاس المركزي بوصول فتاة تدعي " رنا. ج " 22 عامًا، مصابة بحالة إعياء شديدة نتيجة تناولها قرصا كيماويا "حبة الغلة السامة".

وعلي الفور انتقل ضباط المباحث الجنائية وتبين مصرع الفتاة وذلك لمرورها بحالة نفسية سيئة وتعاني من اكتئاب بسب معاملة أهلها لها.