بقالنا 4 سنين شايفين الويل.. شيرين عبد الوهاب تكشف عن معاناتها مع حسام حبيب

اعتذرت الفنانة شيرين عبدالوهاب، لجمهورها على الهواء أثر كذبها عليهم لتحسين صورة زوجها النجم حسام حبيب.

وقالت شيرين عبدالوهاب خلال مداخلة هاتفية  في برنامج "كلمة أخيرة" الذي تقدمه الإعلامية لميس الحديدي على قناة "ON" "عاوزة أستغفر ربنا على الكذب اللي كذبته عشان أخلي صورة إنسان تبقى كويسة وأنا كذبت ودي أكتر حاجة ربنا مبيحبهاش".

وسألتها "الحديدي"، عن ما كذبت بشأنه لترد الفنانة: "كدبت في حاجات كتيرة أوي لأني بنت أصول وكنت عاوزة أرفع صورة إنسان ممكن يروح في يوم من الأيام يتجوز من عيلة تانية وأخلص منه ولو كنت قلت كلام وحش وقتها مكانش هيعرف يتجوز وأنا نفسي يتجوز ويبعد عني".

معاناة شيرين مع حسام حبيب

وتابعت شيرين: "أنا ست قاعدة في أمان الله مع بناتي  بقالنا 4 سنين شايفين الويل سافرنا الساحل وقلنا نقعد أربع أو خمس أيام ونرجع مبسوطين وتتحسن نفسية البنات ونفسيتي ومكناش بنخرج ومكناش عايشين تقريبًا والبنات مكنوش بيعرفوا يقعدوا معايا، لأني كنت عايشة مع زوج مش بيشتغل تقريبًا وكنت محبوسة 24 ساعة في أوضة نومي مش بعمل حاجة، قاعدة بس وأنا غلطت في حق نفسي، وكنت فاكرة أني بحافظ على بيتي لكني اكتشفت أنه مكانش بيت، كانت عيشة فئران أو مصيدة أنا كنت زي الفار اللي بيدخل المصيدة ياكل حتة جبنه".

وتابعت: "كنت عايشة مع راجل مش بيشتغل ولا بيخرج ولا بيشوف أهله ولا أصحابه وكل همه حب الامتلاك  ومع ذلك فضلت جمبه وهو لايعرف إلا فكرة حب الامتلاك وصبرت لأني كنت بحاول أنجح الحب ده ومكنتش  بحب أتهزم وأنا بطبعي أكون خدامة الرجل اللي أعيش معاه".

واستطردت : لقيت نفسي بعد فترة كورونا بدمر وشغلي بيقف الي كنت معتمدة أنه يخلصه ماعملش حاجة وهو شخص مودي جداً وخسرني كل الناس أخويا وأختي وأمي وأصحابي والسائق والشغالة كل الناس خسرهملي وكان بيعتقد أن كلهم متامرين عليه وأقتنعت أن الدنيا متامرة أننا مانبقاش مع بعض وهو للاسف لازم يتعالج نفسياً لانه مريض بحب الامتلاك. "

وأكدت الفنانة شيرين عبدالوهاب أنها لن تنسى سؤال العديد من الأشخاص عنها في أزمتها ومنهم الإعلامية لميس الحديدي والفنانة ياسمين عبدالعزيز ومنة شلبي، متابعةً أنها تعلم جيدًا بوجود مشاكل أهم من مشاكلها الشخصية لدى المواطنين وبدأت تشعر أن موضعها "بوخ".