"المليون اخ" .. تامر حسني يعلن عن مبادرة لمساعدة المرضى الغير قادرين

استجاب الفنان تامر حسني، سريعاً لطلب اليوتيوبر حسين الجوهري الذي طالبه لدعم المزاد الخيري، لمساعدة الطفلة الرقية المصابة بمرض ضمور العضلات.

وأعلن تامر حسني، عن تبنيه لفكره جديدة، يتمنى دعمها ورعايتها لمساعدة المرضى في مصر.

ونشر تامر حسني فيديو من لقاء اليوتيوبر حسين الجوهري في برنامج "حديث القاهرة" من تقديم خيري رمضان عبر قناة "القاهرة والناس" وكتب: يا حسين يا حبيبي أنا معاك و بدعمك وبدعم حملتك الإنسانية السامية وسلامي لصديقي وحبيبي أستاذ خيري رمضان وعندي فكرة أتمنى رعايتها ودعمها من أجل كل مريض فكره مش هتخلي مريض واحد في مصر يمد إيده لحد.

فكرة تامر حسني 

وتابع: لو مليون مصري اشترك فيها هنحل أزمة الأمراض المكلفة في مصر كلها ،، مليون مصري بس من ال 120 مليون مصري هيتطوعوا على حساب معين للتبرع وهيكون في لجنة مسؤولة من جهة رسمية مسؤولة في الدولة بتقييم الحالة ماديا والمليون مشترك دول هيكونوا بيتبرعوا بشكل دائم كزكاة عنهم وعن أولادهم لخدمة مجتمع كامل وممكن نسميها مثلاً صفحة المليون أخ.

وأكمل: كل ما تظهر حالة محتاجه رقم صعب الصفحة هتدرسها وتعلن عن الحالة وتكلفتها التبرع هيبقى في حدود من20 جنيه ل 40 حسب الحاله بس ساعتها أول ما هنعلن هنجمع الفلوس في ثانية لكل المحتاجين وكل المقتدرين اللي ربنا هينور قلوبهم و هيشتركوا في الحساب ده مش هيحسوا أنهم دفعوا حاجه بس هينقذوا حياة اطفال كتير وناس كتير محتاجه، ومين عارف جايز الفكره دي تخلي مفيش ولا واحد مريض في مصر مش لاقي يتعالج وجايز المليون مشترك يكتروا، والله والله والله دي فكره بسيطه مش هتكلف حد بس هتخدم ناس كتير هتخدم بلد هتخدم كل المحتاجين و نخليهم ميمدوش ايديهم لحد يكسفهم، ربنا خلقنا عشان نساعد بعض وزي ما علمنا رسولنا الكريم .. خير الناس انفعهم للناس يعني ربنا بيحب الناس اللي بتنفع الناس وأي صدقه بتخرج من أي حد مستحيل تنقص ماله بالعكس هيضاعفها ربنا في رزقه وهيكرمه و يطهره ويرفع عنه بيها يارب الفكره دي تتحقق.