حوار خاص| مصطفي عباس لـ الصفقة: حبيت شخصية زتونة في مسلسل بابلو..وبحضر لفيلم مع مصطفى قمر
هاجر عاطف
فنان يمتلك حضورا مميزا علي الشاشة ولمع بالعديد من الأعمال في السينما والتلفزيون والمسرح وكانت بداية أعماله الفنية فى عام 2004 وكان باسم خالتي فرنسا ثم توالت الأعمال السينمائية في فيلم أبو علي، بوحة، يوم ما تقابلنا، صياد اليمام، خليك فى حالك، العيال هربت، فاصل ونعود، الدرملي فقري تملي، عائلة ميكي، بنات العم، وخلال الموسم الرمضاني الماضي قام بعمل درامي "مسلسل بابلو" مع الفنان حسن الرداد وكان دور "زتونة" مختلف عليه وعلى جمهورها ولكنه استطاع أن يحقق نجاح كبيرا.
كلمنا عن دورك في مسلسل بابلو .. مع النجم حسن الرداد ؟
مسلسل بابلو يعتبر من أجمل الأدوار اللي عملتها في حياتي عشان بقدم حاجة جديدة حاجة بره الصندوق حاجة مش متعود عليها والناس متعودة عليا بعمل حاجات كوميدي حاجات دراما خفيفه إنما دور شر زي زتونة دا أول مرة في حياتي أعملها، فكان بالنسبالي تحد إن أعمل الواد الصايع البلطجي اللي ملهوش كبير وملهوش حد ودايما بيفتري على الغلابة، فحبيت الشخصية عشان حسيت إنها جديدة عليا وهنعرف الناس إن مصطفي ممكن يعمل كوميديا ويعمل دراما ويعمل سايكو.
استعديت للشحصية ازاي ؟؟
طبعا قريت السيناريو وجهزت الملابس طبعا معروف الملابس ليها دور مهم بدأت أتعامل بطريقة كلام معينة وأسلوب معين وطول معين وطبعا المخرج محمد عبد الرحمن حماقي هو اللي كان علي طول معايا في التحضير للشخصية وكنت بعرض عليه الحاجة قبل معملها وكان بيساعدني كتير لحد ما الحمدالله الشخصية طلعت بالشكل دا.
ليه الناس كرهت "زتونة" بالشكل ده في رمضان ؟
دا حقيقي الناس كلها كرهت زتونة، وهو دا طبعا نجاح الشخصية، وأنا وأستاذ محمد عبد الرحمن حماقي قالي أنا عايز كل الناس تكره زتونة لأن الناس لو صدقت شخصية زتونة هتكرهك إنما لو مصدقتش شخصية زتونة مش هتكره، ولو مكرهتكش يبقي انت كده منجحتش ودروك منجحش، والحمدالله ربنا قدرني أن أوصل للناس إن فعلا دا موجود وأن زتونة دا إنسان مفتري إنسان بيظلم الناس وبيحاول يتهجم عليهم، فالحمدالله الناس صدقت ان زتونه يمثل الشخصيه دي وعشان كده كرهوه والحمدالله دا نجاح للشخصية.
كواليس العمل مع الفنان حسن الرداد ؟
اتشرفت جدا إن انا اشتغلت معاه وهو حبيبي وراجل محترم و ممثل شاطر طبعا ومجتهد وبيحترم عمله وبيحترم أصحابه وبيحاول علي أد مايقدر يكون جمبهم وبيحاول يساعد أصحابه ومكنش بيتأخر معايا خالص وكل المشاهد مع بعض بنحضرها وينقعد نعدها مره واتنين وتلاته لحد ماوصلت بالشكل الناجح دا ومبسوط جدا أن انا اشتغلت معاه وبحبه جدا يعني.
كواليس العمل مع المخرج ؟
طبعا أستاذ محمد عبد الرحمن حماقي دا أخويا وحبيبي وشرف ليا أن أشتغلت معاه ودا مش أول عمل أشتغل فيه معاه أنا أعرفه من 12 أو 13 سنة تقريبا واشتغلت معاه في حاجات كتيره جدا ودا يعتبر أكبر دور اشتغلت معاه فيه وهو كان مراهن عليا و قالي أنا هديك الفرصة دي عشان عايز الناس تشوفك بطريقة غير اللي متعودين عليها والحمدالله يارب يعني نجحت زي ماهو كان عايز.
عارفين انك بتشارك في بطولة فيلم جديد .. كلمنا عنه ؟
بعمل فيلم اسمه "الحب بتفاصيله" مع محمد نور ومصطفي قمر ومصطفي أبو سريع وانا واستاذ علاء مرسي عاملين حاجه محترمة حاجة عائلي كده هو يعتبر فيلم غنائي رومانسي استعراضي كوميدي حاجه كده ان شاءلله هتعجب الناس والحدوده بتاعته هتبفي حدوده خفيفه كده، إن شاء الله يارب تعلق مع الجمهور بإذن الله.
بتتعاون في الفيلم ده مع الفنانين مصطفي قمر و محمد نور .. الكواليس مع نجوم الغناء في السينما عاملة ازاي؟
طبعا هما نجوم كبيرة جدا ومحترمة، والمشاهد اللي كنا فيها مع بعض بتبقي مشاهده لذيذه وفيها روح حلوه، وإحنا عاملين حاجة إن شاء الله حاجة حلوة وجديدة على الناس وهيشوفوا شغل مختلف ومحترم وكوميديه مفهاش أي مضايقه مفهاش اي حاجه تبقي الناس مضايقه انها تتفرج عليها، ان شاء الله وبإذن الله الفيلم ياخد نصيبه في العرض.
ليه .. مصطفى عباس مركز أكتر في الدراما وليس السينما ؟
أول حاجة أنا بحب السينما جدا، والسينما طبعا تاريخ واللي بيعيش للفنان السينما مش الدراما، بس انا بفضل أشتغل سينما لما تبقي حاجات محترمه وحاجات كبيره وقويه، حاجات تبقي في السي في الواحد تبقي حاجات كويسه، انما الدراما طبعا أنا بشتغل دراما محترمه وكبيره وكويسه ، والسينما طبعا بيتعرض عليا أدوار بس مش أدوار بنفس المستوي اللي اشتغلت فيه؛ زي (أبو علي ، فاصل ونعود، بث مباشر، الحب بتفاصيله، ...) ، وأدوار قليله اللي انا بوافق عليها عشان انا عايز أقدم حاجه محترمه حاجه كويسه مش أي فيلم اشتغل فيه وخلاص، وفي الدراما بيتعرض عليا ومش بقبل غير أدوار في مسلسلات محترمه مسلسلات ناجحه زي ( بابلو، أجازه مفتوحه، طرف تالت، عفاريت السياله، المشوار) والحمدالله اشتغلت عن لا يقل عن 58 مسلسل وتقريبا حاجه وأربعين فيلم، فالحاجات اللي انا بشتغل فيها لو مش الهدف منها محترم ومش مميزه مابحبش اشتغل فيها ، وانا أول ماابديت في التمثيل كنت بمثل مع استاذه كبيره و منهم ؛ (كمال الشناوي، رجب علي، علي عبد الخالق، إسماعيل عبد الحافظ، أنور عكاشه) الحمدالله ابديت مع مخرجين وكتاب كبار ، وأنا كمصطفي مابحبش اشتغل وخلاص لو دور مش هادف ودور مش محترم مابشتغلش.
يا تري نفسك تشتغل مسرح ؟
طبعا حلم حياتي، أنا بدايتي كانت مسرح واشتغلت مع الاستاذ نور الشريف ومع المخرج حسن عبد السلام رحمه الله عليه واشتغلت مع اسماء كبيره ، ومؤخرا اشتغلت مسرح مع اصحاب ليا ، انا عايز ارجع اشتغل مسرح تاني ويبقي عرض دولي عرض كبير مش اي مسرح وخلاص وان شاءلله هتيجي قريب.
اتفرجت علي مسلسلات ايه في رمضان ؟
اتفرجت على كذا مسلسل منهم ؛ الاختيار3 والكبير أوي 6 وطبعا مسلسل بابلو.
أكتر مسلسل نجح من وجهة نظر مصطفي عباس ؟
الكبير أوي طبعا، أنا بحب أحمد مكي وعارف انه بيعمل شغل كويس جدا جدا ، وطبعا مسلسل الاختيار ودول أكتر مسلسلات تبعتهم.
كلمة أخيرة .. لكل الناس اللي بتحبك و بتدعمك في مشوارك الفني ؟
أنا بحبهم جدا جدا واتمني يفضلوا دايما يارب في ضهري وبحب اي حد يقولي كلمه حلوه وبحب اي حد بيقف في ضهري عشان انا من غير الجمهور ولا اي حاجه مفيش ممثل بيبقي لوحده الجمهور مهم جدا جدا في حياتي ، وكل اختياراتي وكل الحاجات اللي بختارها بجد دي عشان الجمهور مش عشان خاطري انا ، مش عايز احي في يوم من الايام اعمل حاجه في تاريجي استعر منها او ماحبش حد يشوفها، الحمدالله 23 سنه كل اللي عملتوا فيهم حتي لو أدوار صغيره؛ فهي أدوار مشرفه أدوار معلمه مع الناس لحد دلوقتي والناس بتحترمها عايز افضل كده طول عمري عايز الناس تفضل طول عمرها تحترم مصطفي عباس وتقول ان هو ممثل محترم دي احلي حاجه بحب اسمعها هي الفنان المحترم.
